|
Luns, 08 Febreiro 2010 15:00 |
Participará no workshop organizado pola Asociación Europea de Touroperadores, co fin de potenciar a captación de visitantes estranxeiros, poñendo especial énfase nas cidades con conexión directa a Alvedro
O primeiro tenente de alcalde e responsable da área de Turismo, Henrique Tello, salientou que esta acción enmarcada no Plan Director de Desenvolvemento Turístico da Coruña demostra a vontade por potenciar os atractivos da cidade máis valorados polos europeos, como a gastronomía, a oferta cultural e de ocio ou a paisaxe
Turismo da Coruña participará este venres, 12 de febreiro, en HEM 2010 (Hoteliers European Market), que se celebrará en Londres. Trátase dun workshop organizado pola Asociación Europea de Touroperadores, no que se presentará a oferta da cidade, así como as tarifas dos hoteis coruñeses a unha selección de quince importantes axentes de viaxe europeos. Entre eles destacan touroperadores de Reino Unido ou Holanda, co fin de aproveitar as conexións directas de Alvedro que existen na actualidade e as que se porán en marcha nun futuro inmediato, como é o caso do voo a Amsterdam.
Esta acción ten como obxectivo avanzar na promoción da cidade co fin de captar novos turistas europeos, tal como se recolle nas liñas estratéxicas do Plan Director de Desenvolvemento Turístico da Coruña. Neste documento fíxanse como algúns dos segmentos de turismo potencial o de familias estranxeiras e tamén os chamados empty nesters (parellas de mediana idade con fillos emancipados e poder adquisitivo medio e alto). A estes colectivos e tamén aos viaxeiros de negocios, un sector que na Coruña atópase en plena expansión, quere chegar Turismo da Coruña a través de accións como este workshop, no que se presentarán os principais atractivos da cidade, poñendo especial énfase en elementos moi valorados polos visitantes como a gastronomía, a oferta cultural e de ocio ou a costa e as paisaxes.
O primeiro tenente de alcalde e responsable da área de Turismo, Henrique Tello, salientou que este tipo de accións demostran a vontade de reforzar a imaxe da Coruña en Europa e potenciar as calidades da cidade como destino alternativo ao de sol e praia, potenciando valores como a cultura, a gastronomía ou a identidade propia a través das tradicións, a historia ou o patrimonio arquitectónico. Neste punto, lembrou que a Torre de Hércules será un dos principais reclamos debido á súa declaración como Patrimonio da Humanidade, e que cada vez rexistra máis visitas de turismo estranxeiro grazas á súa proxección internacional. Tamén indicou que a celebración do Xacobeo constitúe unha gran oportunidade para captar ao turismo europeo, convertendo A Coruña nun capítulo imprescindible na visita a Galicia e presentando o Camiño Inglés como unha modalidade en alza á hora de peregrinar a Santiago de Compostela. |
|
Luns, 08 Febreiro 2010 14:56 |
A PRIMEIRA DAS CHARLAS TERÁ LUGAR MAÑÁ ÁS 18.00 HORAS NA QUE SE DARÁ A COÑECER EN PROFUNDIDADE EN QUÉ CONSISTE ESTE SERVIZO INCLUÍDO DENTRO DO PROGRAMA ‘CONCILIA OS TEUS TEMPOS’
A concellaría de Igualdade e Participación Cidadá, que dirixe Margarida Vázquez Veras, comeza mañá unha campaña de difusión coruñesa do Banco de Tempo da cidade da Coruña en diferentes Centros Cívicos da rede municipal, ao tempo que de captación de posibles usuarios e usuarias.
Durante estas charlas, de importante compoñente práctico, as persoas interesadas poderán coñecer en profundidade en qué consiste este servizo, incluído dentro do programa "Concilia os teus tempos" -no que se inclúe o Servizo de atención á infancia- que está a desenvolver a Concellaría, así como as modalidades de prestación e as casuísticas que se contemplan.
|
|
Ler máis...
|
|
Luns, 08 Febreiro 2010 14:50 |
A Concellaría de Normalización Lingüística que dirixe a nacionalista, Ermitas Valencia rematou esta mañá a campaña ‘A Nosa compra en galego’ nos mercados Municipais da Cidade co cen por cen de participación entre os comerciantes. Esta campaña coa que pretende fomentar o uso do galego nos mercados municipais coruñeses e a recuperación das formas tradicionais de compra e venda, repartiu 8500 cadernos da listaxe da compra entre os clientes dos mercados e 180 diccionarios sobre a linguaxe do comercio aos vendedores.
Ademais , revalorizou os mercados como lugar de transmisión cultural achegando formas artísticas como a danza ao Mercado Municipal das Conchiñas, a música ao de Santo Agostiño e a poesía ao Mercado da Praza de Lugo. Neste último, a acción poético- sonora “falar e andar cos mesmos pés”, desenvolvida por David e Estevo Creus xunto ás bailarinas Marta Alonso e Paulina Funes, contou con unha especial participación dos comerciantes que, durante 45 minutos, gozaron dos novos conceptos multimedia de creación poética e desprazáronse, xunto aos artistas, polos distintos recintos do mercado municipal. |
|
Luns, 08 Febreiro 2010 12:53 |
O Concelleiro de Deportes, Xan Xosé Martínez Caxigal, realizou esta mañá unha visita ao futuro Centro de Especialización Deportiva de Esgrima que se instalará no edificio da Casa do Auga.
A visita tivo lugar con motivo da celebración da Copa do Mundo de Esgrima que se ven desenvolvendo esta fin de semana no polideportivo Sagrada Familia. O Concelleiro estivo acompañado do Presidente da Federación Española de Esgrima, Marco Rioja, así como do Secretario Xeral, Antonio García e do Director Técnico nacional, Joaquín Campomanes, quen puideron ver os planos do proxecto no espacio que acollerá dito Centro. |
|
Sábado, 06 Febreiro 2010 00:00 |
A Xunta de Goberno do Consorcio de Turismo da Coruña acordou hoxe elaborar os pregos de condicións
A Xunta de Goberno do Consorcio de Turismo da Coruña acordou hoxe elaborar os pregos de condicións para sacar a concurso a Marca de Cidade no mes de febreiro. Esta acción considerase fundamental para iniciar as accións de reposicionamento da Coruña como destino turístico.
O Plan Director salientaba o carácter prioritario desta actuación e a Xunta de Goberno acordou non escatimar medios nun proxecto tan valioso para o Turismo da Coruña.
Igualmente, acordouse abordar unha modificación dos estatutos para actualizalos conforme á lexislación e para posibilitar unha maior participación do sector privado.
Por último, a Xunta de Goberno acordou cesar do seu cargo ao xerente do Consorcio, nos termos e condicións previamente acordados e con aceptación expresa por parte do xerente.
Esta medida entra dentro das adaptacións organizativas que se recomendan no Plan Director, co fin de reforzar as áreas de promoción e información.
O Consorcio fará público en breve o nome da persoa que estará a fronte do mesmo. |
|
Venres, 05 Febreiro 2010 23:48 |
O BNG considera que na cidade hai un amplo consenso para evitar os excesos edificatorios do pasado.
O BNG defende, igual que sempre, un urbanismo razoábel, de calidade e en beneficio do conxunto da cidadanía.
Por isto, propiciamos que na cidade haxa un debate serio e esclarecedor sobre o novo Plano Xeral, lonxe das intoxicacións e mentiras que está lanzando o PP estes días. A cidadanía debe ter unha participación intensa neste período de información pública e o BNG xa fixo público o seu compromiso de apoiar todas aquelas demandas que vaian na liña do defendido no noso programa electoral.
Lonxe disto, o PP está apelando á irracionalidade, ao medo e aos peores argumentos para descualificar un plano que vai cambiar o “desarrollismo” e os excesos do noso pasado máis recente. O PP busca como facelo o peor posíbel. Quen pode ser tan inconsciente como para defender que non se limiten dunha vez as alturas nos barrios máis saturados e sobredimensionados da cidade? O novo Plano Xeral vai limitar as alturas nos edificios de nova construción en función do ancho das rúas. Pero só nos de nova construción. Os edificios que xa están construídos non van ter problema ningún: no novo plano contémplanse calquera actuación para a conservación, rehabilitación ou reforma de calquera edificio xa construído. O PP está a desenvolver unha campaña premeditada e organizada contra o novo plano xeral, pero non porque estean en contra del, non teñen argumentos para facelo, senón porque lles serve de cortina de fume para tapar as falcatruadas que están a facer desde o goberno da Xunta. O PP non quere que na cidade se fale dos desmáns urbanísticos que están a provocar en todo o país (lei de ordenación do territorio, derogación das normas do hábitat ou unha nova lei do solo que permite máis especulación e destrución do territorio), da privatización de servizos públicos como a sanidade ou os de carácter social e do retroceso na normalización do galego. Porque non debate o PP dos aspectos máis positivos do plano? Porque non quere falar das solucións para a mobilidade, da redución do solo urbanizábel, da ampliación das zonas verdes ou da baixada da densidade edificatoria? O PP non quere unha cidade máis humana e sustentábel.
Con esta campaña o PP non busca a defensa dos intereses da cidade, senón que lle fai o xogo aos grandes promotores inmobiliarios, preocupados por poder seguir especulando e que siga en vigor o Plano Xeral do 1998, que o PP votou a favor xunto a Paco Vázquez. |
|
Venres, 05 Febreiro 2010 23:45 |
ENTRE AS PRIMEIRAS ACCIÓNS QUE SE LEVARÁN ACABO DESTACA A ELABORACIÓN DUNHA GUÍA DE RECURSOS TURÍSTICOS CONXUNTA NA QUE SE RECOLLERÁN OS DISTINTOS RECURSOS TURÍSTICOS DA CIDADE E A SÚA ÁREA METROPOLITANA
O PRIMEIRO TENENTE DE ALCALDE REUNIUSE ESTA MAÑÁ COS REPRESENTANTES DE TURISMO DOS CONCELLOS INCLUIDOS NO CONSORCIO AS MARIÑAS PARA ANALIZAR E ESTABLECER ESTRATEXIAS CONXUNTAS ORIENTADAS A POSIBILITAR O POSICIONAMENTO DO DESTINO COMO ÚNICO E DIFERENCIADO
O Primeiro Tenente de Alcalde e responsable do área de Turismo no Concello da Coruña, Henrique Tello, reuniuse esta maña cos Concelleiros e Concelleiras de Turismo dos distintos concellos do Consorcio As Mariñas na primeira Mesa de Concelleiros de Turismo do área Metropolitana para analizar o plan de marketing conxunto para a comarca proposto como resultado dos estudos realizados dentro do Plan de Dinamización do Produto Turístico da Coruña e do Área Metropolitana. Este Plan de Marketing Turístico comarcal inclúe unha serie de accións conxuntas orientadas a posibilitar o posicionamento do destino como único e diferenciado, así como as estratexias e actuacións que se van a desenvolver nos vindeiros anos para optimizar a promoción e posicionamento do destino no mercado turístico.
Este Plan de Marketing comarcal forma parte do Plan de Dinamización do Produto Turístico da Coruña e a súa Área Metropolitana co que se busca aumentar a actividades turística no destino e as rendas que dita actividade xera, consolidándoa como un dos motores da economía e o emprego do área. Así mesmo, outro obxectivo consiste en lograr unha oferta turística do Área Metropolitana competitiva e sostible que conte coa colaboración e implicación das distintas administracións locais.
O Plan de Dinamización desenvólvese a través dun convenio de colaboracións subscrito entre o Ministerio de Industria, Turismo e Comercio, a Secretaría Xeral de Turismo, o Concello da Coruña e os que integran o Consorcio As Mariñas e a Asociación Provincial de Empresarios de Hostalaría da Coruña.
Durante o encontro analizouse a primeira fase do Plan de Marketing Turístico do Área baseado na diagnose da situación actual. Así mesmo establecéronse unha serie de accións conxuntas entre as que destaca a elaboración dunha Guía de Recursos turísticos conxunta na que se inclúan os distintos recursos (patrimoniais, naturais, gastronómicos...) da cidade e da súa área metropolitana como destino único. Ademais crearase unha web conxunta na que se recollerá toda esta información. Dentro da mesma web de Turismo da Coruña haberá un espazo onde se recollerá toda a información e distintos recursos turísticos dos concellos que integran o Consorcio das Mariñas.
Os obxectivos deste encontro centráronse en recompilar e analizar a información cualitativa necesaria sobre aspectos máis relevantes relativos a oferta, demanda e competencia do destino; analizar os produtos turísticos e estratexias do desenvolvemento turístico actuais; determinar obxectivos estratéxicos do plan de acción; e optimizar as medidas de actuación que versarán sobre o produto, a promoción, a comercialización e a xestión do espazo turístico. |
|
Venres, 05 Febreiro 2010 23:39 |
MARIO LÓPEZ RICO EXPLICOU QUE O GOBERNO LOCAL ESTÁ FACENDO TODO O POSIBLE PARA CHEGAR A UN ACORDO NEGOCIADO CON RENFE QUE PERMITA ACELERAR OS TRÁMITES DE LICITACIÓN DAS OBRAS E INICIAR CANTO ANTES AS OBRAS
O Concelleiro de Vivenda e Rehabilitación Urbana, Mario López Rico, reuniuse esta mañá cos representantes da Unión Galega de Cooperativas de Vivendas quen tiñan solicitado este encontro co concelleiro para tratar entre outros temas o estado actual do Parque Ofimático de Eirís e o seu futuro. Os representantes das cooperativas manifestaron asúa preocupación polos trastornos que as posíbeis demoras poderían causar ao cooperativistas. Neste sentido o Concelleiro de Vivenda tranquilizou aos presentes porque o Goberno local, desde a área de urbanismo, está a facer todo o posible por chegar a un entendemento con Renfe para alcanzar un acordo negociado co fin de axilizar o máximo posible os trámites necesarios para levar a cabo o proceso de licitación e que as cooperativas podan comezar canto antes as obras de urbanización na zona.
Así mesmo, López Rico trasladou o seu total apoio e colaboración aos distintos representantes das cooperativas de vivendas poñendo a súa disposición toda a infraestrutura da Concellaría de Vivenda para obter toda a información que precisen sobre as distintas posibilidades para este tipo de promoción de vivenda na cidade.
Os representantes das cooperativas amosaron así mesmo a súa disposición á colaboración coa Concellaría e insistiron na necesidade de imprimir ao proceso a máxima celeridade, idea compartida polo propio Concelleiro de Vivenda.
Este encontro foi solicitado polas Cooperativas tras reunirse a finais do pasado mes de xaneiro con representantes das preto de 300 familias que forman parte das Cooperativas A Carnocha, Confuncovi e Eirís Ofimático, adxudicatarias de varias parcelas no Parque Ofimático de Eirís, para coñecer de primeira man o estado do proceso, que tal e como subliñou o Concelleiro de Vivenda no encontro, continúa o seu camiño e non vai sufrir paralizacións. |
|
Venres, 05 Febreiro 2010 11:51 |
Francisco Jorquera denuncia que “con esta actuación a SGAE desprestixia a protección do dereito de propiedade intelectual e desincentiva o interese pola cultura dos nosos escolares”
O portavoz do BNG no Congreso dos Deputados, Francisco Jorquera, presenta unha iniciativa na que denuncia o “abuso” da SGAE ao pretenderlle cobrar aos alumnos pola representación escolar dunha obra de teatro e insta ao Goberno a modificar a lei para que isto non se permita.
Francisco Jorquera lembra o caso concreto do instituto coruñés Ramón Menéndez Pidal, onde os alumnos levaban traballando semanas para representar a peza “Bodas de Sangre”, de Federico García Lorca, e que ante as limitacións do centro escolar e para atraer a un maior número de público ían representar no Fórum Metropolitano da Coruña, “un espazo que é un centro cultural municipal”, subliña.
Porén, o deputado do BNG denuncia que “a SGAE caeu sobre os alumnos deste centro e esíxelles o pagamento de 95 euros en concepto de dereitos de autor”, a tarifa que a sociedade xeral de autores apica a un espectáculo gratuíto de teatro afeccionado que non é escolar, xa que, segundo o criterio da SGAE ao no representarse dentro das instalacións do instituto non ten ese carácter.
“Un abuso que desprestixia a defensa da propiedade intelectual”
Francisco Jorquera considera que esta actuación da SGAE “desprestixia a defensa dun dereito lexítimo, coo é o da protección da propiedade intelectual, pero que levado até o seu extremo, coma neste caso, constitúe un auténtico abuso e desincentiva o interese ola cultura dos nosos escolares”.
“É necesario modificar a lei neste aspecto”
Ante esta situación, o deputado do BNG presenta unha iniciativa na que lle pregunta ao Goberno central se non considera que non se deberían cobrar dereitos de autor aos centros escolares pola representación gratuíta e a cargo do alumnado de obras relacionadas coas artes escénicas e musicais.
E en caso de que este suposto si estea contemplado na lexislación actual, Francisco Jorquera pídelle ao Goberno que se modifique con carácter de urxencia para que a representación de obras culturais en centros escolares a cargo do alumnado e con carácter gratuíto estea exenta do pagamento dos dereitos de autor. |
|
Xoves, 04 Febreiro 2010 16:42 |
A CONCELLEIRA INAUGURARÁ ESTA TARDE A MOSTRA COA PRESENCIA DALGÚNS DOS MEMBROS DO GRUPO DE XOSÉ FERNÁNDEZ FERREIRO, CÉSAR ÁREAS, MÉNDEZ FERRÍN, RAMÓN LORENZO, BAUTISTA ÁLVAREZ, BERNARDINO GRAÑA E HERMINIO BARREIRO
A Concelleira de Cultura, María Xosé Bravo, presentou esta mañá a exposición ‘Brais Pinto’ que acolle desde hoxe a Casa Museo Casares Quiroga e que se inaugurará esta mesma tarde ás 20.00 horas coa presenza dos membros do grupo Xosé Fernández Ferreiro, César Áreas, Méndez Ferrín, Ramón Lorenzo, Bautista Álvarez, Bernardino Graña e Herminio Barreiro.
 A finais dos anos 50 un grupo de estudantes e traballadores galegos de ideoloxía esquerdista formou en Madrid o grupo denominado Brais Pinto. Dentro del convivían, entre outros, Xosé Luís Méndez Ferrín, Bernardino Graña, Raimundo Patiño, Xosé Fernández Ferreiro, Bautista Álvarez, Ramón Lourenzo, César Arias, Herminio Barreiro, Alexandre Cribeiro, Manuel María e "Ben-Cho-Shey".
Ademais de organizar faladoiros, actividades culturais e crear unha editorial e unha colección de poesía, os membros do grupo Brais Pinto evolucionan teoricamente cara o marxismo, e neles comeza a madurar a idea de formar un novo partido nacionalista de esquerda superador do "piñeirismo".
Nun comezo, as bases ideolóxicas do que ía ser a organización eran vagas, consistían en liñas xerais, en reactualizar o legado do PG e darlle unha nova orientación ao nacionalismo galego. O grupo non puido sobrevivir polas súas propias diversificacións e no 1964 desapareceu. Pero quedou constituído nun referente para as loitas nacionalistas de Galicia e sobre todo, foi semente dunha xeración de importantes artistas e dun amplo labor cultural.
Doutra banda, considerando que Uxío Novoneyra formou parte deste grupo e dedicaráselle o Día das Letras Galegas de 2010, esta proposta expositiva poderíase integrar dentro das actividades de difusión e homenaxe. Ademais, a relación antedita co “piñeirismo” e a homenaxe a Ramón Piñeiro de maio de 2009, pode definir e contextualizar a situación dos nacionalismos do ultimo terzo do século XX.
Os obxectivos da mostra tal e como sinalou a Concelleira de Cultura, María Xosé Bravo, son, entre outros, destacar a importancia do grupo Brais Pinto dentro da evolución do galeguismo cultural e político,presentar un panorama de recoñecemento dos grupos nacionalistas galegos, mostralo como contribución á renovación literaria galega, trazar perfís dos integrantes, adaptar a mostra aos deseños curriculares dos distintos ciclos escolares e ofrecela como actividade complementaria ao aula.
|
|
Ler máis...
|
|
|
