|
Martes, 09 Febreiro 2010 17:57 |
O número de visitas duplicouse en 2009 con respecto ao exercicio anterior, destacando o tour nocturno pola Cidade Vella pola súa orixinalidade e encanto
O primeiro tenente de alcalde e responsable da área de Turismo, Henrique Tello, anunciou que no mes de marzo retomaranse estas visitas, que están a converterse nun grande reclamo turístico
Entre os visitantes destacan os madrileños e cataláns do resto do Estado, así como os británicos e portugueses entre os europeos, tamén os 14 australianos que participaron no programa, que desde o ano 2009 é gratuito
A Os tres programas de visitas guiadas postos en marcha por Turismo da Coruña están acadando cada vez máis éxito, tal como se desprende do balance correspondente ao ano 2009, o que o número de visitas practicamente duplicouse con respecto ao ano 2008. No pasado exercicio participaron no tour nocturno pola Cidade Vella, así como o percorrido pola Torre de Hércules e a Ruta Picaso-Modernista un total de 2.105 persoas, fronte as 1.130 que se acolleron a esta oferta de Turismo da Coruña no ano anterior.
Os programas de visitas turísticas, que desde o ano 2009 son de carácter gratuíto e contan coa colaboración da Deputación da Coruña, estanse a converter nun importante reclamo á hora de captar visitante4s á cidade, o que non só queda demostrado polo número de participantes, senón tamén polas múltiples entradas na web de Turismo e chamadas á oficina para solicitar información sobre estas visitas.
Ante o éxito acadado nas últimas convocatorias, o primeiro tenente de alcalde e responsable da área de Turismo, Henrique Tello, anunciou que o programa retomarase no mes de marzo e ademais vaise elaborar un folleto con toda a información de interese sobre o programa de visitas guiadas que se distribuirá nos hoteis e restaurantes da cidade, coa colaboración da Asociación de Hospedaxe (Hospeco).
Con respecto ás cifras de visitantes, a modalidade con maior éxito pola súa orixinalidade e encanto foi o tour nocturno pola Cidade Vella, no que participaron un total de 1.248 persoas. En segundo lugar sitúase a Torre de Hércules, que incrementou moito o rexistro de visitas grazas á súa declaración como Patrimonio da Humanidade, pasando das 182 en 2008 ás 652 o pasado ano. Por último sitúanse as visitas á ruta Picasso e ruta modernista, que tamén aumentou dos 85 aos 205 participantes en 2009.
Por procedencia dos visitantes, os turistas do resto do Estado foron os máis numerosos, acadando a cifra de 1.418. Entre eles destacan os de Madrid, con preto de 550 visitas, seguidos de Barcelona, Valladolid, Asturias, Bilbao e Toledo. Con respecto aos visitantes estranxeiros, Europa encabeza a lista, con 106 participantes encabezados polos británicos, portugueses e franceses. No que respecta ao resto das orixes, foron 94 os procedentes de países americanos e destaca a cifra de visitantes australianos, que ascendeu a 14 persoas.
No relativo ao tipo de aloxamento no que se hospedaban os participantes nestes programas, os máis numerosos corresponden a hoteis de catro estrelas, cun total de 490 persoas, seguidos dos de tres e dúas estrelas.
|
Turismo 
